di Giovanni Piga (Nuoro)

Non luchet prus isteddu
in su chelu ‘e domo
pro dare alenu a s’ànima ‘e su pessu;
in coro unu supeddu
m’est jubilande como
de m’arriscare a facher s’atraessu
de su mare cainu
pro fughire s’ustinu
chi m’an sinnau donnos a revessu;
ca si non fugo, isentu
abbarro in custa terra chen’apentu.

Una grista d’ispera
in su turmentu ‘e s’unda
pro sas intrannas meas chene alas,
de sa luche s’ispunda
chircande a galabera
a cudd’ala ‘e sa ruche ch’apo in palas.
… Ma si nch’arribbo, frade
azicu ‘e amistade
a mi la das in custas uras malas?
Unu respiru ‘e pache
ti pedo ebbia, fizu ‘e su nurache.

Su sole ‘e s’esistèntzia
si nch’est rughende a pizos
in custa terra ‘e làmbidos poderes:
est solu penitèntzia
su viver pro sos fizos
chi de s’intranna issoro non sun meres.
Su cras no at incuru
c’arbeschet zai iscuru
in locu meu, peri si non cheres…
Chin anneu t’improro:
a mi l’aperis sa janna ‘e su coro?.

Non ti pedo su bundu,
si d’ispera m’apentas,
ma unu granu ebbia ‘e umanidade
de cudda ch’in su mundu
peri tue, s’ammentas,
… una die as pediu, in dinnidade…

Giovanni Piga (Nuoro)